Takimi i dytë për të analizuar dhe diskutuar kontratat në Skenderaj

Grupi i auditorëve socialë në Komunën e Skenderajt, në koordinim me partnerin lokal, organizatën joqeveritare Skenderajlive – SKL, organizoi takimin e dytë për të analizuar dhe diskutuar kontratat, skicat dhe dokumentet e dy projekteve të përfshira në Auditimin Social në këtë komunë: Rikonstruimi i kulmeve të Shkollave Qirez, Llaushë dhe Anton Qeta në Skenderaj; Poligoni sportiv në Shkollën “Ahmet Delia” në Skenderaj.

Në takim u ndanë mendimet e përfaqësuesve të dy shkollave lidhur me zhvillimin e punimeve në rikonstruimin e kulmeve, duke vlerësuar punën e bërë deri tani. Auditorët socialë theksuan rëndësinë e komunikimit të vazhdueshëm mes drejtorive të shkollave dhe ekipit të ndërtimit për të siguruar që çdo shqetësim të adresohet në kohë.

Gjithashtu, grupi i Auditimit Social e mirëpriti ndërtimin e poligonit sportiv në shkollën “Ahmet Delia”, por theksoi rëndësinë e përdorimit të materialeve të përshtatshme. Në të kundërtën, nënvizuan se përdorimi i materialeve të papërshtatshme mund të shkaktojë dëmtime dhe rrezik për sigurinë e fëmijëve dhe të rinjve gjatë aktiviteteve sportive. Ata theksuan se investimi në cilësi është esencial për të siguruar një ambient të sigurt dhe të duhur për zhvillimin e aktiviteteve fizike, duke garantuar kështu mirëqenien e nxënësve.

Grupi do të vazhdojë me fazën tjetër të vizitës në terren për të dy projektet. Kjo fazë do të përfshijë vlerësimin e përparimeve në punime dhe monitorimin e cilësisë së materialeve të përdorura, si dhe sigurinë dhe përputhshmërinë me standardet e kërkuara. Kështu, do të sigurohet që këto projekte të përfundojnë në përputhje me pritshmëritë dhe nevojat e komunitetit.