Instituti Kosovar për Qeverisje Lokale, me mbështetjen e Ambasadës Norvegjeze ka nisur një fazë të re të angazhimit të fokusuar sektorial, nëpërmjet programit LGA – Empower që ka për qëllim fuqizimin e rrjetit të akademisë dhe mbështetjen e drejtpërdrejtë për komunat e Kosovës.

Takimi i parë i grupit tematik: “Administrata dhe Reforma” u mbajt sot (e premte), më datë 30 Shtator 2016, në hapësirat e Institutit KLGI me ç’rast u caktuan objektivat dhe agjenda e përbashkët, duke përfshirë dhe qasjen që duhet ndjekur gjatë punës në grupet tematike.

Drejtori ekzekutiv i Institutit Kosovar për Qeverisje Lokale – KLGI, z. Besnik Tahiri, theksoi se Kosova e ka të nevojshme ri-mendimin dhe rishikimin e sistemit të pushtetit lokal dhe se anëtarët e grupit tematik duhet të jenë drejtpërdrejt në identifikimin e nevojave dhe sfidave të pushtetit lokal. Andaj, ekziston nevoja për prodhimin e sygjerimeve dhe rekomandimeve për institucionet kyçe, si Ministria e Administrimit të Pushtetit Lokal dhe Parlamenti.

Gjatë këtij takimi u pasqyruan objektivat që do të arrihen përmes këtyre grupeve punuese, të cilat janë: Zvogëlimi i paqartësive ligjore; standardizimi i shërbimeve, procedurave dhe politikave (harta e procedurave dhe dokumentacionit), kontraktimi i shërbimeve dhe bashkëpunimi ndër-komunal, koordinimi i programeve trajnuese në mes institucioneve dhe organizatave vendore dhe ndërkombëtare; praktikat rajonale dhe inovacioni.

Në një diskutim të përgjithshëm të aspekteve që lidhen me administratën dhe reformën u theksua se kemi një korpus të madh të shërbyesëve civil dhe se kapacitetet vazhdojnë të mbesin të mangëta. Problematikë tjetër po ashtu mbetet ende komplikimi i procedurave dhe paqartësitë ligjore, ndërkaq aspekti i vlerësimit dhe kontrollit mbetet ende tejet i mangët.

Po ashtu, u diskutua edhe lidhur me mbingarkesat e stafit, ku si pasojë e kësaj buxhetet komunale, apo investimet kapitale po dëmtohen në masë të madhe. Mirëpo, pavarësisht kësaj u tha se edhe vetë procesi i reformës duhet të jetë i kujdesshëm duke pasur parasysh gjenden socio-ekonimike.

Programi LGA – Empower në fazën e parë nëpërmjet grupeve tematike synon të angazhohet në diskutime të fokusuara, avokim dhe adresim të politikave dhe programe të qëndrueshme sektoriale, në avancimin e politikave funksionale, ofrimin e rekomandimeve dhe opsioneve për akterët që angazhohen në nivelin lokal. Ndërkaq, faza tjetër ka të bëjë me fasilitimin e ekspertëve për grupet tematike, në hartimin e politikave dhe programe të qëndrueshme për nivelin lokal.

Programi LGA – Empower, është derivat i programit LGA, e që për synim ka angazhimin e drejtpërdrejt të udhëheqësve dhe zyrtarëve komunalë, ekspertëve, përfaqësuese të nivelit qendror dhe shoqërisë civile në ndërtimin e programeve dhe politikave të qëndrueshme për nivelin lokal.