Nëpërmjet diskutimeve, trajnimeve, punëve në grupe u zhvillua trajnimi modular treditor (2-4 korrik) për Organizatat Joqeveritare (OJQ) në nivel lokal, lidhur me procesin e monitorimit të financimit publik të OJQ-ve në nivel lokal dhe procesin e monitorimit të konsultimit publik në komuna.

Në ditën e parë, fokusi i trajnimit ishte në: Rolin dhe angazhimin e OJQ-ve në komuna; Parimet e qeverisjes së mirë dhe demokracia e drejtpërdrejtë; dhe Bazën ligjore dhe strukturën e funksionimit të komunave. Në dy ditët e tjera, pjesëmarrësit u ndanë në dy grupe: një grup verifikoi të dhënat e mbledhura nga monitorimi i financimit publik të OJQ-ve në nivel lokal për vitin 2023, ndërsa grupi tjetër mbajti trajnimin e avancuar mbi metodologjinë e monitorimit të konsultimit publik në komuna.

Financimi publik i OJQ-ve lokale dhe konsultimi publik janë procese kyçe për një qeverisje lokale të suksesshme dhe të qëndrueshme. Për të përmbushur qëllimet e zhvillimit lokal dhe për të rritur pjesëmarrjen e qytetarëve, është e rëndësishme që qeveritë lokale të angazhohen në mënyrë efektive me OJQ-të dhe komunitetin në përgjithësi.

Ky trajnim u organizua në kuadër të Programit për Angazhim Qytetar, një iniciativë pesëvjeçare zbatuar nga Fondacioni Kosovar për Shoqëri Civile (KCSF) në partneritet me Agjencinë e Shteteve të Bashkuara për Zhvillim Ndërkombëtar (USAID). KLGI është partner i KCSF-së në realizimin e këtij aktiviteti.

#programipërangazhimqytetar